Till huvudinnehåll

Davvisámigiella (Nordsamiska)

Skuvladárkkástus lea stáhtalaš eiseváldi. Eiseváldi bargá dan ovddas ahte visot mánát ja oahppit ožžot dásseárvosaš ja buori kvalitehtalaš oahpu oadjebas birrasis.

Skuvladárkkástus dárkkista skuvllaid ja árvvoštallá ohcamušaid mat gusket friddja skuvllaid álggaheapmái. Friddja skuvllat leat skuvllat mas lea eará jođiheaddji go gielda. Skuvladárkkástus maid bearráigeahččá ahte skuvllat čuvvot lágaid ja njuolggadusaid.

Mánáid -ja oahppiid ovddasteaddji lea maid Skuvladárkkástusas

Mánáid- ja oahppiid ovddasteaddji bearráigeahččá ahte skuvllat čuvvot njuolggadusaid mat gusket mánáid ja oahppiid rivttiide skuvllas. Jus eiseváldi lea ožžon dieđuid ahte skuvllas leat givssideamit ja bilkideamit de mánáid- ja oahppiid ovddasteaddji iská áššiid. Mánáid- ja oahppiid ovddasteaddji sáhttá maid gáibidit vahátbuhtadusa mánáide ja oahppiide geat leat vásihan bilkideami ja givssideami.

Heajos dilli skuvllas

Dáppe lea diehtu dutnje gii oainnát ahte skuvllas leat váttisvuođat dahje ahte máná dahje oahppi skuvladilli lea heittot juoga ládje.

Váldde oktavuođa ovdaskuvllain dahje skuvllain

  • Jus ovdaskuvllas/skuvllas leat váttisvuođat de berret váldit oktavuođa oahpaheaddjiin, rektoriin dahje eará bargiin. Jus mánát/oahppit dárbbašit mangelágan doarjaga skuvllas de lea rektora ovddasvástádus ordnet dan. Rektor lea maid oahpaheaddjiid ja ovdaskuvlla/skuvlla bargiid hoavda.

Váldde oktavuođa váidámušdoaimmain

  • Jus don it leat duhtivaš rektora gieđahallamiin de don sáhtát váldit oktavuođa su hoavddain, mii lea gielda dahje friddjaskuvlla oamasteaddji. Gielddas/friddjaskuvlla oamasteaddjis lea ovddasvástádus das ahte mánát ja oahppit sihke ožžot buori oahpahusa ja dovdet oadjebasvuođa skuvllas. Sii fertejit váldit vuostá ja guorahallat váidámušaid.
  • Jus don háliidat váidalit de oza dieđu skuvlla websiiddus dahje gieldda websiiddus. Lea maid vejolaš jearrat veahki soapmásis skuvllas.

Addit dieđuid Skuvladárkkástussii

Jus skuvllas leat duođalaš váttisvuođat ja gielda dahje friddjaskuvlla oamasteaddji eai čoavdde váttisvuođaid de dus lea vejolašvuohta váldit oktavuođa Skuvladárkkástusain.

  • Mii eat guorahala buot dieđuid maid mii oažžut. Mii mearridit jus mii galgat guorahallat ovtta ášši ja maid got dan guorahallama galgá čađahit.
  • Min vásáhusat skuvllaid ja gielddaid/friddjaskuvllaid oamasteaddjiid birra ja maid eará dieđut skuvlla birra váikkuhit min mearrádussii, jus mii guorahallat dahje ii. Eará dieđut leat omd áššit mat leat boahtán ovdan skuvlajearahallamis oahppiiguin, bargiiguin ja fuolaheaddjiiguin, min ovdalaš dárkkisteamit ja eará statistihkka skuvlla birra.
  • Nu ahte Skuvladárkkástusa bargu lea ávkin nu máŋgga oahppiide go vejolaš de mii dárkkistit áššiid skuvladásis ja guođđit áššiid mat gusket ovttaskas mánáide/oahppiide. Dat mearkkaša maid ahte vaikko mii leat ožžon dieđu ovtta ášši birra mii guoská ovttaskas oahppi de mis lea vejolašvuohta dárkkistit ášši skuvladásis.
  • Skuvladárkkástus ja Mánáid- ja oahppiid ovddasteaddji dárkkista muhtin ovttaskas oahppiid ášši. Omd. jus oahppi lea vásihan bilkideami dahje jus okta oahppi lea olu eret skuvllas, dahje jus skuvla ii atte doarjaga oahppiide. Ovdalgo Skuvladárkkástus dahje Mánáid- ja nuoraid ovddasteaddji álggahit guorahallama de mii árvvoštallat jus stáhtalaš geahčču gáibiduvvo. Dat mearkkaša ahte mii geahččat maid mii diehtit skuvlla ja gieldda/friddjaskuvllaid oamasteaddji birra ja maid got gielda/friddjaskuvllaid oamasteaddji meannudit dakkár áššiid.
  • Mii eat juohke áššis álggat guorahallama, muhto mii leat giitevaččat buot dieđuid ovddas maid mii oažžut. Du dieđuid sáhttá geavahit máŋgga ládje ja leat árvvolaččat min bearráigeahččodoibmii nu ahte mii oažžut obbalaš gova skuvllas.

Almmolašvuođa prinsihppa

Buot dieđut mat bohtet min lusa leat almmolaš áššebáhpirat. Dat mearkkaša ahte vaikko geas lea riekti lohkat daid. Skuvladárkkástus eai juoge suollemassan doallangeatnegasvuođa dieđuid. Skuvladárkkástusas lea diehtosuodjenjuolggadusa jelgii maid geatnegasvuohta suddjet hearkkes persovdnadieđuid nu ahte dieđut eai geavahuvvo lobiheamit.

Persovdnadiehtovástu

Skuvladárkkástusas lea persovdnadiehtovástu dain persovdnadieđuid meannudeamis maid eiseváldi gieđahallá. Go don válddát oktavuođa Skuvladárkkástusain de sáhttet dát čuovvovaš persovdnadiehtomeannudeamit čađahuvvot:

  • Registreren min it- vuogádagaide
  • Dieđuid sádden eará eiseváldái
  • Meannudeapmi bearráigeahččodoaimmas
  • Vurken

Geahča dáppe jus háliidat eanet dieđuid sihke min integriteahta policy birra ja maid du rivttiid birra registrerema oktavuođas, https://www.skolinspektionen.se/Om-oss/integritetspolicy/

Oktavuođa dieđut

Telefovdnanummar: 08-586 080 00
E-poasta: skolinspektionen@skolinspektionen.se
Čujuhus: Box 23069, 104 35 Stockholm
Guossástallančujuhus: Skolinspektionen, Sveavägen 159, Stockholm

 

Senast uppdaterad: 22 juni 2022